Misinkacat luk tenbem....Sarra kol katassam le.

#Meysi_luk_mayaabukan..

Alqi meysi luk mayaabuka, Elle yan aracak radaanam kee Kaxxa xongoloolak meysitam akkewaytek. Takkay ikkal gersiimik meysitaanam, sarra edde yanbeemil kaa tabbixeeh, barita.

Elle Yanbeenimil sinam tabbaxu xiqtam, namma meysi. Tohum baxaysi meysi kee salî(Ascokka) meysi.

Baxaysuk meysitaanam bartnaam, qusbam gibbattek, tuk teyna abtam gibbattah tan way, kulli uddur koo yascakkeeniih, bayissek, koo digaalanam tekkek, baxaysi meysi koo kak tabbixe. Cl. Tuk teyna abtah tan uddur" Cab!Takkel Soolisay, eweq, kat atu xiqtam mantuk" kok axcuk tenbek, isil Aamine waanaah, addah isi yableenim kook kak geyta. Tohum kaxxa mooral diglo kol katassa.
Toysa " Bale, Maaxiga" axceey wokkek waali gace yakkeenin koo kak geyta.

Tonnah agraa kee ascokki edde yenek, xuwaw edde aneweek, Kaxxa bohoy kee meysi sinam tabbixe.
Lakat anu maduudaay, boola liyo, Faxem abaah, gibbatam maduuda, qusbam hadlam maduuda yaanamih hangisso( bohoy) kol katassa.
Tohih taagah" Maduuda, Maaxiga" Yaanamat culla. Qusbam abaanam ascubinnaan uddur, baxaysu kee net takkeh tan salik abna bohoyuh, Meysi bagu sinaamak taakume.

Toysa faxe caagidil, madudnaay, manaaxiga iyyan raddi elle gacsaanam barit nek takke.

Baxaysuk meysitaanam, furrayniinô manoh addal, numul baxaysu kataasah yan naharsi sabab kinni. Woh yaanam luk tenbeh tan inki caagidil baxaysiteyyo iyyaanamih meysi, sarra tanbeh tan uddur, gibbattaamal baxaysu koh bahta yaanama.

Tokkel ginook linoh nan misinkacâ mablat xoqoysimak qusbam ginaanaah, fanxah nanim geynaamak, dudda likih Fanxam akah geynam xiiqe waynaamih sababittet nantifiqeeh, a caagid abnam madudna axcuk sababitte akah roorisaanamat culla.

Taham sehdaytu akak tabbixem, xaleyna takku dareefah ummatta, qunxa mariinol kot abtah tan ilaaqaay, saliiy, ascokkaa Kee buraay, umah tan digaala sinaamal katassam kinni.

Gersinnal kaadu, buxal xaleyna, kacanu akah acayuk, hanaawisak, faylisak, ascassuk tenbeh tan alqi, faxe caagid abam xiiqah iyya kibal isil luk yambeeh, misinkacat bohoy luk mayambaamih taagah, abaanamal agdaabe geya.

Tonna kinnuk, alaaqa fooca fanah le xaleynaay, ummatta kee isi baaxoh ginook Yalli keenih yeceeh yan duddat antafaquk, meqe caddo gufoonuh, qunxa mariinol, ken faysaanam, yascasseenim, barsaanam, kacanu keenih yaceenim, haanawiiy, mango dacayri keenih abaanam faxximta yaanama.

Qunxa_mariinol misinkacat kok cultam, sarriimaanel kol katassam le.

Ali boogisah!

Ali_boogisam, matablaanaa
Nanu nansirem, matablaanaa..
......
• Uma faala nek cabay soola
• Uguta' ittikiyyay enketta.
• Lino nasril goyta faatoysa
• Bisoh innuh goyta neh xaaqa!!!

• Ali rookitak, bisoh yooweh
• Alak rabbatem magaq waytah
• Alí madluk ixxi yembeggeh
• Agabuuy alaaqa boogissah....

• Tiiqol baruuga kaak raqteeh
• Gumá' saaku kaxxa wallit tan
• Ni lubooka, baaxo raaqisseeh
• Qafariinol itro' daabisseh!!

• Yi Qafar cami elle sinnim le
• Baaxô mukno way maqansissa
• Gaadul mayso caglah orbissa
• Malal abtam, abtol arcissa
• Kämolayyo' qigdu moggolta
• Makudál migaqle qallalle le
• Itrol elle hagga hayta ginneytale
• Qafariinoh itrol inkiino le
• Goori giclol mayso caglah le!!!!

Gomoyli

https://m.facebook.com/story.php?story_fbid=1297964650376554&id=1160095264163494&sfnsn=mo

Qafariino yoo lafta

Qafariino yoh tayse!

•Kedo mayyû maxcâ may,
Qafáriino yoo lafta
• Baad elle yoh seecam,
kedo hinnay yok agata
• Kedol itro way maabaay,
Amoder qafar loowita
• Qafar inkih inki meelaay,
ramadi keenik inki caxá
• Qafar inki agattiinay,
radi keenik inki caxá.
• Caxá luddi maggoomuh,
luudul ma muggaqsan
• Caxá kak tanim ramiduuy
,luud kak samad hinna.
• Caxá sinnim ludditteey,
isi caglitak masolta
• Kedo woo bisiy luuduuy,
Iyyaani kak qafara

• Kedol itta kurraamah,
kinnaane nek Qafarák.....
• Ane sinni baxsa cabay,
Qafariinol nee gacisa.
• Ni dadal ni goori faxak,
Qafár gooril itta qika.

Qafariino yoo lafta

Qafariino yoh tayse!

•Kedo mayyû maxcâ may,
Qafáriino yoo lafta
• Baad elle yoh seecam,
kedo hinnay yok agata
• Kedol itro way maabaay,
Amoder qafar loowita
• Qafar inkih inki meelaay,
ramadi keenik inki caxá
• Qafar inki agattiinay,
radi keenik inki caxá.
• Caxá luddi maggoomuh,
luudul ma muggaqsan
• Caxá kak tanim ramiduuy
,luud kak samad hinna.
• Caxá sinnim ludditteey,
isi caglitak masolta
• Kedo woo bisiy luuduuy,
Iyyaani kak qafara

• Kedol itta kurraamah,
kinnaane nek Qafarák.....
• Ane sinni baxsa cabay,
Qafariinol nee gacisa.
• Ni dadal ni goori faxak,
Qafár gooril itta qika.

DNL Maxcooca

Doogisa niqballèh maxco

• Xukko tanim giclo tanih, giclo tanim mayso tanih!
• Cakki gorrisa num, xaqamtoh aftot maqilagsima.
• Ni inkittiino ni agatah libdooy, ni ittinway ni agatah nikso.
• Ginneyta nek inkiinooy, libdo elle linom goori.
• Nel itta gee maral, nanu itta wayneh.
• Net foxo kak tanim, nek net raqte rike.
• Ni milaagi, ni goori faxa!
• Wacarriyih dalalleeh, darraqat nunsumuumeh!
• Qafár gooril inkittownek, Qafár fayxi rakisenno.
• Qafárah naabukeh ikkal Qafar nekkeh manan.
• Maxcol qafar kinninok, abtol qafar nakkay.
• Maxcol qafár goori linoh innam, Qafárah xiqtam mali.
• Qafár baaxo, umeenit edde daanimta gabla hinna.
• Xukko cina, Qafár gooril koboxxeeh, Qafár inkittiinol tengeleeh, inki hadaf xissimte.
• Goonáh abnam guneey, caddi kee ittat abna ganóoy, cisdit ninni agat ninkiseh!
• Nek tenegele boolat yinnikisseh yan agat, yengele gooriiy inkittiinot ugsaanama.
• Boolal tengeleeh, gooril baxsimneh.
• Nî mirocti, agat goorik garbi goorih lafitte.
• Boffolite kasat, Agat miraacisaanam mabicta.
• Beedi santiitat, le ummatta qooxxam, Qafar mirocti. 

Yí-inay yí-baaxo gaddaalè

☑️Yiinay,yibaaxo gaddaale

Yi baaxo Yiina,  gaddaale.
Qerta qaleey,xalol gaddale.
Qasbooy maqaadin addale
Qasabad gaddi kūkoyta
Hawaash weeqayti kullalta.
Kuginooy koo celtam ankel tan!!

Qadli cadaaratih aydaadule.
Baadal aytîgexxole amoytitle.
Baadal wacaysir arkeena
Gaane ginôgaddih orbeena.
Sehda samadak firti raceena.
Amoxer qafár cagalta maglalla.

Mango'agat Elle waara fanteena.
Isaa'moh xin lagook le maglalla.
Qaada bilah Le xaylo xalteena.
Kaamolayyo baxqisà xalteena.

Baadak agaarad Elle aban baaxo.
Baadal yabloonu kah dulan baaxo.
Buqreh yakke dariita Le baaxo.
Gabdaytit Elle taddare baaxo.
Bakaarak Elle yalaggen  illalta.

Yiinay ,yi baaxo gaddaaley.
Qafarak mano'elle solta'nay.
Qafár Elle yaaxigen markabay.
Qafár inkim abta fanteenay
Ku xaqallem ankel taniih.

Yí-inay yí-baaxo gaddaalè

☑️Yiinay,yibaaxo gaddaale

Yi baaxo Yiina,  gaddaale.
Qerta qaleey,xalol gaddale.
Qasbooy maqaadin addale
Qasabad gaddi kūkoyta
Hawaash weeqayti kullalta.
Kuginooy koo celtam ankel tan!!

Qadli cadaaratih aydaadule.
Baadal aytîgexxole amoytitle.
Baadal wacaysir arkeena
Gaane ginôgaddih orbeena.
Sehda samadak firti raceena.
Amoxer qafár cagalta maglalla.

Mango'agat Elle waara fanteena.
Isaa'moh xin lagook le maglalla.
Qaada bilah Le xaylo xalteena.
Kaamolayyo baxqisà xalteena.

Baadak agaarad Elle aban baaxo.
Baadal yabloonu kah dulan baaxo.
Buqreh yakke dariita Le baaxo.
Gabdaytit Elle taddare baaxo.
Bakaarak Elle yalaggen  illalta.

Yiinay ,yi baaxo gaddaaley.
Qafarak mano'elle solta'nay.
Qafár Elle yaaxigen markabay.
Qafár inkim abta fanteenay
Ku xaqallem ankel taniih.

Takkem matablaanaa

Qafarey_takkem_matablaanaa?
(Doogisa N.)

Yí meeláy qafarey takkem matablaanaa
Dabqil xakak waynam sugay matablaana
Beedi net aba gaaduk sugay tu mantaana
Ním nel tabbixe xukkok yaadoy tu mantaana
Beedi neh aba falma, able waynannaa
Hinnay tan umaane, rabitneh innannaa??

Net takkem wararaay,sinam magaadinno
Labha nek rabtaah, ní baaxo gaafittam
Sidooca gaysal way inkih xakak waynah
Net takkem wararaay,nanu itta qaasuwna
Beedi ganda xisaah, nan dulah kudna
Ta bisle boola inkih buxal neh masuginnak
Yaadoy nel maca radde milki kah waynam???

Beedi nel malisaah, nanu inki xiinit nan
Ní gadda weeraanaah, nan ligak kak nan
Nel maxci ittageyaah, nel kookaxaw reede
Agat goorih bayeeh kedoodal itrinaah
Qafarre nek teerreeh, nan werrekit nannooh
Beedi net yable foxoh, inki nee gaadak
Má saakuuy qafarey nanu itta kaal geynam
Malqooy qafar xayloy beeda agatak waasnam¿

Ni agat, nek goori faxa

Kedo kinnaane matakka

Qafar addal kedooda kaxxam mangoh. Qafar ummattah ixxima kee kedoodah maggah takkem itta beytam hinna. Takkay ikkal woh ginooy, samadaay itta elle naaxigê gidi ikkal kedooda yaysih gaci mali.

Awayih uddur kedo itta elle yaaxigen beduk taturra inteh agatah haysitaanam temeeteh tan.
Kedo num lago ikkal kinnaane mabaxxaqissam asmata immay naddal kedo hinnaaneh haysitaanam temeete. Rakaakayaak iroh gersi rakaakay fan genxek atu miyyaay iyyan way qafara inna. Woh kah kinnim agattiinaay, kinnaaneey nee elle yaaxigeenim xiqaana qafar kinniimih sabbata. Wokkel kedô migaq warisnaamah nee taaxigem matan, kedo agat hinnaay kinnaane nek baxxaqise waytaamih sabbatah. Takkay ikkal ninnik ninnih itta cagalla baaxol, kinnaane ninnik warisnam kedo.

Qafár kinnaane le num, Qabalal maqellita.
Yot elle celtannal, Qabala kak iyyaanam usug leh yan bisu yaanama. Tohuuk ugutaak Qafár num cissil(bisu) yamixxigeh iyyaanama.

Takkay ikkal inki num usug leh yan bisul qafar kinnaane lem kaak yaaxigeenimih, usug qafarak manni kedo kinnim yaaxigeenim maxiiqan. Usug warseh akkewaytek kay cissil kay kedo yaaxigeenim maxiqqimta.

Toysa nee tasgallem kinnaaneey nee elle yaaxigen bedu, kedooy bedu nek hinnaay, nee elle yaaxigeenim, gersi marak nee elle baxsaanam maxiqqimta yaanama.
Toysa nanu inkih nee elle yaaxigen beduk, ambulle sinni kediini bedu macah doorinnaah??

Yok Qafarayye goyta faatootah.




Ní Agatih Mano, ní gooril qekuh tan.

Qafár Qunxaaneyti, Qafár ummattah mano milaagimtuh aban giclo, cakki gicló kinnim waaga lem hinna.
Qunxaaneyta tesgellem agát goori.
Agát gooril qekuh yan hadafal, inkittiinol abna giclo bisoh haak geytiman.

Takke giclo ahan fan assakatle gurral akkuk geytimta. Baxsa sinnim, kookaxaw sinnim kee Abaanamal akah baxaysite waanam, giclo akah takkem cakki goran kinniimiiy, giclok silaacah loonum, Qafár baxiini goori kinniimi.
Toh kaadu gooril inkittoowak ittalih kah macaleenik gorrisaanam geytimtam taybulle.
Uxik anuk aham fan xukko kee ceyat akah sugnem gooril ittalluk macale waak sugneemih sabbat kinnim tascasse.
Nanu inki abbah xayloh anuk duma nee gaadoonuh net aben baxsat net yekke gaadi, aham fan edde nan caddot nee yabbixe.
Yi mablal, Qafar edde nan caddot dagaak Oobissem, agat gooril aben salaca kinnim yoh tambulle.

Kaadu ní ummatta edde tan manok milaagimtuh, awayih uddur elle abnannal
gooril rakitta inkittiinol abna giclo edde nan caddok nee tayyaaqu xiqtam.

Ux mablal itta elle baxisnaamal, Qafar saaxah fanah beynaah, gooril abna angoyyat kaadu qafar saad fanah beyna.

Toh yaanam Qafarak mano qekuh elle tanim qafar xayloh goori yaanam. Qafar xaylok agat goori salceeh, keddeemanna fanah gexeenim, Qafarak mano saaxah gexxam kee Qafar xaylo kaadu agat goori kee inkittiinol itta waklisek, Qafarak mano saaddaah, milaagimtu xiqtam taybulle.

Tohuuk ugutaak Qafarak mano axawah edde tanim nanu qafarah lino goori nek akkinnaanih gide. Goori boolaatek qafarak aniina boolattam kee qafarah lino goori nek maqar yeellek qafar libdo bahta yaanama.
Tonna kinnuk ninni agatih mano ninni gabat saaxise waynam faxxinta. Ninni agatah mano saadisnuh away qaynoonisnah goori kee inkittiino nagay libdo bahsisnaah, sarrimaanele innal bisoh haytuh umman kah macallam faxxinta.

Maabbooniiy, Maballooni

#Maabbooniiy_mabballooni.......

Adaban umam temeeteh tan.
Assacakkeh meqe weelo tan.
Cakki bayeh,deedali reedeh yan.
Goori bayeh kookaxw mano tan
Qadli bayeh tu gabbisil takkeeh
Gabdagoyti gar mageyam nable.
Curriino kee gar mayanam nable
Xukkô xinto qanxaffelem nable
Xukkô cintam digaalalem nable
Dulmi qiktam  acwalem nable
Neegas abtam qasbi lem nable
Ayyunti inkih cakki wayam nable.
Tuugimaytí bisol yanim nable.
Tutaaxigó bultuk mano nablek
Yallaw meqem baahey.

Ramad xaynal aban guneyta tan
loyna wayteh gano edde takkem tan.
Agat goorik cankâ fayxi amol tan
Atlaakê mayitit cabcabittam tan
Keddaaminnuy ramid xeeri yaniih
Ummatt lakqot maqsa'bah nable
Iná gunek qargak marah nacem nable
Xaylo liggaysak beeda naydirreeh
Xayam wayah ligat tanim nableeh
Qadom wayah ceyat tanim nable
Iggimaatet doolat miraacimah nable
Beedi farmot ummat qidah nablek
Yallow meqe baahey.

Yinti ableh umam tableeh......
Yayti aabbeh umam taabeeh
Maabbooni maballooni yanik
Yalli meqem baahay.

Xinto kak yaanam ayyunti taama abeyniti

#Xinto kak yaanam Ayyuntí taama'beyniti.

Ayyuntí fayxih Aakam tacee xintó, ayyunti xaqul konnaba geyta.
Xinto yaanam ayyunti awlaytiino sunkul kak daffeysen mara. Inkih yan ayyuntih fayxi rakisoonuh mixxaage akah yaceen mara.
Ayyuntí nim abele yaanamih kibalal reedisan mara. Xintó yaanam ayyuntí leh yan cawlay afdige lon axcuk ayyunti awlaytiino,quukah dagaral kak tan mara. Ayyuntí awlaytiino keenil tabseek lakal, ayyunti keenil yeceeh yan amaana dacrisaanaah, elle faxxintannal, kah faxxinta taamal asisaanam xintok taama.

Ayyunti leh yan gibdaabinittee kee fayxi baxisak, Aakam akah yaceenim faxxintam addak kak meexak, kah yaguudeh yan sissik calli akah yaceenim ken taama. Amolladih, ayyuntah faxximmatam abaanam kee ayfaaf yaceenim xintol dirki ikkal doorit hinna.

Xintô dagorti ayyunti keenih tabseh yan awlaytiinot elle faxxintannal xoqoysimeenik, keenil tan dirkik duddaluk yewqeenik, ayyunti xaqul oggol geyan. Tah duddaluk abaanam ken dirki kinniway, isinni taama meqennal abniseenik, ayyunti xaqul oggol kee kunnaba geyaanam raqmali.
Takkay ikkal ayyunti keenil yeceeh yan taama abeweenik, abaanam xiqeweenik, isinni qaaqak yawqeenim xiqeweenik, keenil tabseenim ayyuntal gacsaanam kaadu ken dirki.
Kalah kaadu massos keenik faxxiimek ayyunti iyyam kee esseram oggolaanam dirkih keenil tan. Keenik aba axcuk keenil tabseenim abaanam hinnay ayyuntah qusba gibdaabinitte hadleenik, ayyunti keenik qambaalam hinnay ayyuntal qaduwwi yekkeeniih, ayyunti gar esserek ayyunta qaduwwi intit table xinto yekkeenik ayyunti xaqul oggol mageyaanay, ayyuntak qaduwwi yakken. Xinto isinni qaaqa habbella hayteh ta bisle gexsot kortek ayyunti awlaytiino keenik hirgitam cakkiiy, woh cineenik giclot ken oobisaanam doorit sinni gita.

Tohuuk ugutaak ayyunti taama neh abele axcuk reedisen mari ken taama abek,ayyunti meqe kibal keenil haa, woh abeweenik ayyunti isinni taamak ken diiriyaah, taama meqennal taamita mara tamlisaanam ayyunti caglah leh yan gaará.

Xinto kak yaanam ayyunti taama abeyniti

#Xinto kak yaanam Ayyuntí taama'beyniti.

Ayyuntí fayxih Aakam tacee xintó, ayyunti xaqul konnaba geyta.
Xinto yaanam ayyunti awlaytiino sunkul kak daffeysen mara. Inkih yan ayyuntih fayxi rakisoonuh mixxaage akah yaceen mara.
Ayyuntí nim abele yaanamih kibalal reedisan mara. Xintó yaanam ayyuntí leh yan cawlay afdige lon axcuk ayyunti awlaytiino,quukah dagaral kak tan mara. Ayyuntí awlaytiino keenil tabseek lakal, ayyunti keenil yeceeh yan amaana dacrisaanaah, elle faxxintannal, kah faxxinta taamal asisaanam xintok taama.

Ayyunti leh yan gibdaabinittee kee fayxi baxisak, Aakam akah yaceenim faxxintam addak kak meexak, kah yaguudeh yan sissik calli akah yaceenim ken taama. Amolladih, ayyuntah faxximmatam abaanam kee ayfaaf yaceenim xintol dirki ikkal doorit hinna.

Xintô dagorti ayyunti keenih tabseh yan awlaytiinot elle faxxintannal xoqoysimeenik, keenil tan dirkik duddaluk yewqeenik, ayyunti xaqul oggol geyan. Tah duddaluk abaanam ken dirki kinniway, isinni taama meqennal abniseenik, ayyunti xaqul oggol kee kunnaba geyaanam raqmali.
Takkay ikkal ayyunti keenil yeceeh yan taama abeweenik, abaanam xiqeweenik, isinni qaaqak yawqeenim xiqeweenik, keenil tabseenim ayyuntal gacsaanam kaadu ken dirki.
Kalah kaadu massos keenik faxxiimek ayyunti iyyam kee esseram oggolaanam dirkih keenil tan. Keenik aba axcuk keenil tabseenim abaanam hinnay ayyuntah qusba gibdaabinitte hadleenik, ayyunti keenik qambaalam hinnay ayyuntal qaduwwi yekkeeniih, ayyunti gar esserek ayyunta qaduwwi intit table xinto yekkeenik ayyunti xaqul oggol mageyaanay, ayyuntak qaduwwi yakken. Xinto isinni qaaqa habbella hayteh ta bisle gexsot kortek ayyunti awlaytiino keenik hirgitam cakkiiy, woh cineenik giclot ken oobisaanam doorit sinni gita.

Tohuuk ugutaak ayyunti taama neh abele axcuk reedisen mari ken taama abek,ayyunti meqe kibal keenil haa, woh abeweenik ayyunti isinni taamak ken diiriyaah, taama meqennal taamita mara tamlisaanam ayyunti caglah leh yan gaará.

Giclo akah Abnam

✊✊#Giclo_akah_abnam✊✊✊✊

Giclo akah abnam milaagi fayxi
Giclo akah abnam gorrisna cakki
Giclo akah abnam qafar dadaltu
Giclo akah abnam manô milaagu
Giclo akah abnam ninni koborru
Tan kaamollayyok ramid bayisnu
Garqaay atlaakek samad bayisnu
Ní ummatta Wayta cakki edde geytu
Axaw digaalak currih naloolu
------
Giclo akah abnam
------_------i
Ceyaay gadaamak bas calli geynu
Casbiiy digaalak salaam cagallu
Marin gabal gexxa xinto cinnu
Marin kasat gexxa xinto sadnu
Mari elle yadre dabqil dadallu
Kedooy rasul yakke baxsa cinnu
Qafar baxiinul ittal koboxnuuy
Qafar migaq baadal bilhadisnu.

Giclo akah abnam
-------
  Wadirraaqat tan qafar matarru
   Taamaay baritto ninnaafat abnu
    Qafar dadlissa xinto geynuuy
     Qafar wayta cakki geynuk
      Macal sadaanaah ta bisle giclo

Cakki gorrisa num, xaqamtot maqilagsima

#Cakki_gorrisa_num_ayrâ_yab_kee_xaqamtoh_aftot_maqilagsima.
,
Cakki gorrissam ceelak, isi maslacatat waah iyya cakkik raaqa num, aftô gorantoh aba giclo ikkal cakki gorrisa num hinna. Qafár wayta cakkih abta giclot gaba yasgalli ceelak afto geek wadir raqtu kak waytek qafar ayyunti akah sangeeltah tan afto koh aceelek, isi buxal elle idiy.

Lakin faxe adafitte edde yakkeenimih cakki buulaanam maxiqqimta. Faxe num beera edde nadamsitu waah yan umaanet asaamak naharal tu cubbuseh abam tayse.

Faxe num  isih elle Aamanuk abah yanim arac xagsah. Kulli num umam takkeeh, meqem takkeemih baguuk elle yaamineh yanim abam faxxinta. Atu isih hadaf aalle waytek, hadaf daabiseh yan mari ken hadafih agdaabeh qokol takkuh koo tamlisaanam raqmali. Abah yanim akah abam Aaxigewaa num abam faxam maduudusa.....

Sinam aba intam abtam faxxintam isih elle taamineh tan waqdi. Aba yaanam umaane kinnim abluk abtam sarra misinkacal dalka kok takke.

Eddeey cakki gorrisah yan numuk cakki bayissuh aban gaadi umman kak awqe wayta nadaama koh bahtaama.

Faxe num meqem abek kaah meqeeh, umaane kaadu kaak lafitak biyakta num mali.
Sinam umam kok abtaamah atu umeena takkem mafixxinta..

Takkal ascassem faxam gabal afto kah haan waqdi abak sugem cabtam dumaak abaamih hadaf luk wee numu. Tohuuk amakkaquk, cakki gorrissam ceelak xabaq intam qafar cakki waytaamal aamine waah, xukko cina giclol Aamine waa mara kinnim Aaxaguk tamannal matluukwa tenek addak saffosnay.

Fidin mabla

👉Fidin mabla
Umman buxah addah kasat gexaanam kee kullim ibak sanal yableenimik raqnam tayse qunxaaneytaw.

Ah akah tekkem tahih sabbata axcuk abre sinniimil kullim ceena luk yableenim kee uma gammil yableenimit asissike waynam tayse.

Umam innuu kee umam abnuh abna xobbaq, maqaanee kee sarrimaane leemih abnam tayse.

Awayih uddur qunxaaneytak ittat foxo gorrisaanam, numuk teyni iyyam nagay kusaaqisekal, uma neefel beyaanam kee axcinnaanim fidinuk ablewaanam barte marak qambaalimtam hinna.

Faxe caagidik tûxiq kee tû kaloot qafar caddol waginnam tayse. Ilaa ahan kulli caagid inkih ninni kee ninni dareefak bisol nubleh manaaxigaay, tahan fan kookaxaw ikkal tûxiiqih kak geynem mannu. Tonna kinnuk caagiida fidinuk nableeh, qafarah le maslacat kee tûkalootul agaaradnek aysuk raqta.

Barte mari kulli caagidik addat boositak agaaradah yan mara ikkal tu kak kusaaqisekkah yascakkeh, sada mara hinna.

Kaadu baritto yaanam mabla milaagu, tu elle abluk sugtennak fidinuk yableenim kee caalat milaagu kol kataase waytek barittem maxiqqimta.
Tohuuk amakkaquk kullim barte marih innal nableeh, kusaaqisnam tayse.

Uguta

#Uguta
,
(Doogisa N.)
✂Calli sinni horaay inki gandissa.
✊Cakki wayta hooraay cakki gorissa
✂Dabqa buuba maraay tut maqal sinni
✂Agat gaada maraay goori kah sinni
👊Fanat yarde maraay tu hadaf sinniiy
🔢Qafar mango horah ittak baqitteh tan.

,
Cakki wayta horak gaadule intaanaah
Cakki baysa marak garkurá intaanaah
Qafár buuba mara toobokoh tablen
Xukkot xiinisá way makaabonuh tublek
Gar geytimam malqooy deedal xintot anuk??
,
#Aysa_yab_hinnak_giclo_fanah.....

✔Ugut ugut itikiyyay qafar gar matara
✔Qafar milaagimtuh ittalluk macala
✔Mabla baxsa cabaay tayseemil malisa
✔Ni giclo arac xagtuh umman kah macala
✔Cankah fayxi cabay agat uysukuma
✔Xukko xinto malik xukko saduh soola
✔Qafar maslacatah roociy qabal mekla.

#xukko cina
#Kassiisih axcem
✂ Tama qalaamat elle yan mara xukko cina wiliqik irgiqay caba
👊 ta marak amok kabudi haay xuunay caba. G.g

doogisaniqballe.wordpress.com

Abtol Qafaarimtnam faxxinta.

#Anu_Qafára.
Nanu inkih  Qafára.   Nanu  inkih qafar hinnino yok mantan, lago edde linom qafar tekkek.

Sehda ittak Elle baxsaanam kinnaane. Nanu gersi agatak Elle baxsimnam qafar kinninoomu. Tohuk dagaa Kee gubal tu matan. Faxe num isi migaaqak qimbissa heeh gexak yeneek qafar kinniyo axcele.Faxe num nek gersi num hebeltô kedoh qabala leh yan axcuk usug le cissil kedo kaak yaaxigem maduuda. Lakin inki num leh yan cissil ta num qafar qabala leh yan axcuk qafar kinnik akkewaam kaak yaaxigem duudah. Toh akah kinnim koo, yoo Kee Nanu inkih qafar kinninoomu.

Cangalxalaay akak radne qafar kinniimih sabbitih qabalal ittak naaxige. Inkim nee abtam qafariinô lagooy Nanu inkih qafar kinnino. Toysa Qafar akkuk gersi guba raqta lagol ittah seecnam mafaxxinta. Guba raqtam axcih kedo. Kedo migaaqa ikkal kinnaane hinna. Kedo Kee kinnaanek cangalxah tanim kinnaane. Toysa kinnaanek kedol yoh seecaanam, kedol amixxigem mafaxa innih yan numuk. Akah lafitam kinnaaneey gersi agatak Elle baxsimah Anil amixxigeemih lafitaay doorittam qafar kinniyo yaanama. Inkih qafar kinninom giddi Maliy qafar kinninom sin awlisak baxxaqsam duudah. Raqtem dooriti. Kü dooritit culam maduudaamih sabbatah. Kulli num isih dooritaam duudah Lakin anu innih Qafára.

Qafárah naabukeh ikkal qafar akkekal nan.

2tô exxa
Nanu inkih qafara. Nek agattiina inkittooy wohum Qafara. Akah naabukem naaxigeh ikkal wohum giddi Mali.d
Qafár uxih akkekal akah nanim macaay,mannal makkinnooy àxcuk adda kak waginnay.

Qafár akah akkekal nanim dibuk Qafáriinul ittat abna xayna mannu.uxih lagol itta baxisnaah,itta xayyosna.
Kinninom naaxigeh ikkal kedok akah malafinna. Keddaaminnah abna agxe qafara axcuk mabna. Dibuk qafara axcuk ittallih taamitnaamal qafar agattiina Annal sugak maana. Cankah kulli num Annal sugak mananna. Woh akah axcem qafarah ittallih Abne macal anewaama. 
Kulli dabaanal ubka dibuk hinnay Qafár yekke mari yaniih, lakin oson feeral loowiman. Kullimik Qafárah lafitak lon gooril abinal ayballuk sugen.lagok kinnaaneh lafitak sugen.
Takkay ikkal dibuk ubkal Qafárah yan mari ken abto sadak oson dibuk tu abaanam maduudinnoonuy wakli kee catô wayteh udduuruk yaakumih raben. Tohum asmatah Qafár yekkeh yan Mara.

Hay Nanu inkih abinah Qafár nakkeemil, away macaddot sugak nen. Nekkeh sugnaamal, away nakkeemil inki agataay linoh nani ceyat sugak maana.

Qafar akkekal naninom asmatah elle nablem kulli num isi kacnih badat nek giirisaama, kinnaanek lagoh lafitnaama.....umman elle naamem,ittalle selnam ninnii kee net axaw leemi ikkal qafar caagid hinna. Dibuk  qafar caagidil aamek amqe nakkeemil tuk teynak ten. Lakin ni taama wohuk iroh taniimi.
Tamahih sabbata anu akah naabukeh ikkal qafar uxih akkekal nan akah axcem...
itta nabbixem faxxinta wakti edde nanim qafarey. Kulli agattiina ikittiino isinnik diggosseeh, loonuh yanin gar kee cakki inki xongolot esseritan. Nanu lakin wonnal manan. Cakki waytam kee cakki geyneh intaamah nan. Lakin uxih geyneemiy amolle miqnoh tumannu.
Tohih taagah qafar naabukeh yaanam dibuk hinnay Qafárah lino goori abtol ayballuk inkih qafar nakkem faxxinta. Awayih uddur oromo itta tibbixeemih taagah abinah oromo yekkeenimih taagah faxaanam geyaanih mangom luk sugan way. Nanu lakin tumannuuy, qafar uxih akkekal nan.qafar nekkeh innam hununuh qafarah dibuk macallaah,qafar caagidit ittalluk agxinnah nan waqdi. Qafar caagid dibuk wagta mara maliiy inkih nee wagtak inkih qafar nakkay taway nan waktil.

Wagariiy maqaane.

Kedóh abbobti kee Qafariyyo

Kedóh abbobti kee Qafariyyo

Kedoh abbobti isinnih kedoh awlaytit dibuk miraacisaanaah, abinnaanim isinni kedoh maslacatah aakam acayuk aban.
Kulli kedo, kedoh abbootanal hayta num, woo kedook geerih caagidit kaxxam isi magxisa.
Yi mablah kedóh abbobti, Qafariyyol keenik qambalsima doori madigraanam yoh tambulle.

Eddeey doolát nekkeek lakal, kedoh abbobtih doori, kedook bisoh magexam abinah tambulle.
Kedoh abbobtih yan mari, isinni kedoh awlaytit woo kedoh kacanu kee gooril lallabisaanâ ikkal ken kedoh adoytit qafariyyô gooril lallabisaanam matan.

Kedóh abbobtih garil, kedo yaanam itta elle batroonu iyyan caddok bisoh hayya heenik woo kedoh xaylo, isinni kedo agat innal akah yablen innal ken lallabisan.
Hay kulli kedoh abbobti, isinni kedo wagittaamat dibuk aadayuk qafariyyol lallabise weenik keddeemanni mannal salcaah??

Toysa doolat fanah waginnek, kedok teynak inki num reedek, kay kedo kee kedoh abbaay usug kedoh ikoyta kinnim kaa ascassuk sugeenik, ummattah inki gid takkeemit keddeemannu culse kal maraaqa.
Ummatta awlisaamah, kay kedo kee kedoh abba, atu isih kedoh Aakam ucuya iyyaanamih amri edde yenek, qafariyyoh mannal taamitam duudaah???

Kaxxa taqabi yaanam kedoh abbobti, ummattah inki gid Takke doolat caagidit doori taalleemi. Oson dibuk kedô caddol sinni yubleenik, qafarah inki gid yakkoonu maduudan.
Kedoh abbobti qafariyyol ummatta lallabissaamal, isinni qafariyyo yaalleenimil, kulli qafar baxi qafariyyo goori Aalluk yenem yot celta.
Kaadu kedoh abbobti, doolat caagidit cultam gita hinna. Oson isinni kedok bisoh yascube mara akkeweenik, ummattah inki gid takke doolat caagidit culaanam keddeemannu fanah sinam beyta.

Itta fan gacissa heek, keddeemanni mabla ugut akak abtam kedoh abbobti yaanamih mabla. Wohuk sabab oson abbisan kedoh xaylo, keddeemannut akah cultam, oson qafariyyo gooril ken lallabise waanama.
Tohuuk ugutaak, Qafár xaylo qafariinô goori fan gactuh, kedoh abbobti isik qambalsimta doorik tawqem faxxinta.
Kedoh abbobti dibuk hinnay sultaanitte kee makaabon, ummatta qafariyyo fan gactuh kaxxa macal abaanam faxxinta.

Keddeemannul tarrukuse siyaasa, sugte buxa abuuruh gacissa.

 

.

[ ] Doolát xissam ummattaay, Kah xissimtam kaadu ummatta. Doolát isi ummattah ayfaaf tacayuh xissimta. Tooway ummatta xissittah tan doolat edde miraacimtam siyaasâ massoyna. Siyaasâ massoyna kaadu xissam ummattay, doolát kee ummattak loynah raqtam ummatta. Inki baaxoh ummatta addal agattiinal, diinil, cissil kee kalah taniimil sissinaane yaalleenim bictah.

[ ] Too baaxo miraacissah tan doolát, ta ummattaay mangoomul baxsa leh tani, fanteena abtah tan siyaasâ siiratat miraacisaanam faxxinta.

[ ] Takkay ikkal exxak teynal qeegisa siiratat miraaciseenik, ummatta kee doolat fanat, kalah kaadu ummatta fanat bood ugtam raqmali.

[ ] Ceelalloh....Kaxxa Somalia

[ ] Soomaaliyah doolatih addal xeflih kedol rakuh xissimta siyaasâ gexsit, kaxxa soomaaliyaay baadal meqe caddo gufteh sugtek abuuruh gacissa hayte.

[ ] Adam deqsitah yan maxige elle baxxaqsannal " keddeemanni taagah Soomaaliyal kulli kedo, doolát siyaasat mixxaaginna kee muddaqiino Edde gorrissa.

[ ] CL. Soomaaliyal kulli kedoh mari, ken kedoh num doolatak presidenti yekkek, hinnay kaadu doolátak fayyale miraaciino yenek elle kaxxiinitaanam yascasse.

[ ] Tonnah kaadu doolat miraaciinot inki kedo maggom tekkek, kulli kedoh mari qadli mayanam kee inkid akkiyyi anewaam yascuben.

[ ] Adam(1992) Tonnah elle baxxaqsannal,

[ ] Keddeemannul rakuh tarrukuseh tan siyaasah sabbatah, kedooda muddaqiino kee mixxaaginna axcuk ittat boodaanam xalteeh, kalah kaadu ayyuntiino qadli_wayah ummatta fanat sittinway kee kookaxaw Gintem yascasse.

[ ] Cl. Somaaliyyal ummatta fanat addak addah carbi kee doolát qaskarih carbi yekkeh yan uddur mango kedooda doolat miraaciinol ittah anaakarak sugte.

[ ] Toh tonnal anuk keddeemannul xisan siyaasâ sabbatah Soomaliyah doolatal ummattâ fanat isinnik isnnih tabna udduuruk muxxi carbi yekkem yascasse.

[ ] Tohuuk amakkaquk Qusba dimokraasih xintot miraacimta doolat xisoonuh mango gibdaabinitte katasse. Keddeemanni dalkah kedok teyna reedal gactek, gersi kedooda carbih ugutak ittin fanih carbi soolisaanam maxiqqiiminnaay, soomaaliya carbi bulul tikkate.

Soomaaliyal uxi fan sabhaalal le doolát xissimtam maxiqqiiminna. Dimokraasih siirat uxih maqimbinnaay, doolát mirocti kee Parlamah adoytit uxih kedol dooraanamih gexsot tan. Tohuuk uguttaamak, wagri kee addak addah carbi uxih Soomaaliyak kulli dareefal ambullak geytima. Taway tu elle tan caddok taturtek qafar ummatta uma

[ ] QADP 27 liggidah qafar addal fixiixissem ta mabla. Ummatta keddeemannu ittat tuyuxe. Kedo inkinnah dumaak sugtem elle akkale waan gurral, kedô baxiinul itta waklisaanaah, qokolaanam bahsisse. Ummattak qafar baxiinu goori siibimeh.

[ ] Ta mabla ummattat ginteek lakal doolat fanah bahaanamat culte. Kedô baxi arac gersi kay kedoh baxa ciggiilisaanamat ammate. Biiroora kedol loowitaanamat amma yaanamih caddo fan. Ummattâ taamal kedô xiso fanah edde gufte caddo.

[ ] ta umaanet ayyunti fanat kookaxaw ugsaanamih taamat yanin. Ummatta taamal yan num bayseemil esseremek, essera mari kay kedoh naqabuh abam ceelisak kay kedoh mari kaah elle hawissannah abaanam. Tah inkih elle takkem qafar ummattah inkigid takke doolata. Tah inkih akah takkem marin kasat isi ummatta gaadda miraaciinoh sabbata. Hay taway Soomaliyal takkeemik macal baxsale QADP massoyna.

Taway massoynah addat tan keddeemanni gexso bisoh ittek, lakal kaxxa baxaysu neh baahele.

 

Ní umam abto nel katasse' baxaysu

Xukko cinay

Qadaritte

#Xukko_cinay!
👉Hadaf bagul digga'xica.
👉Deedal abtot xukka'xica.
👉Sinni gital saanih gexa.
👉Qafáriyyol itta ibbixa
👉Inkittiinol ingiicilaay
👉Ummattak tattabat soola!
...
👍Neegasleelát mangalina
👍Qayyentí'aadok waali gaca
👍Daraasseemih wakli caba
👍Xiine cinak garci caba
👍Tu ablekalah mackumina
👍Lino xagnak habbel caba
👍Ummattâ salaam dacrisa
👍 Kah sollem ken kinnim kasa
👍Beedi xayloh garci caba
👍Daalicaa kee taanu cabaay
👍Umman tuh bical sugaay
👍Abto nablem fan macala!!!

👍Uma xinto rubsusseenih
👍Barte cayla katasseenih
👍 Immay mangom uxih taniih
👍Milaagu ablekalah naniih
👍 Abto ablekal salac cabaay
👍Sehdat maqal mannu cedaay
👍 Abto nablem fan macalaay
👍Ittaliinol digga xicaay
👍Hadaf bagul digga xica
👍Sinni taamak habbel caba!!!