Qiisak Baaxô wararih ekraaro kee Abnisso

👇Qiisak Baaxô wararih ekraaro kee Abnisso
...
(🖊Doogisa niqballe)
__________________________

Qiisi net abam, Saqi qayso kee leê gorantoh aba carbi hinnam, kak qellitta mari yanim makkala.
..
Qiisi qarkakisa, Qafar baaxó bukko kee wararat koborak, Kaxxa soomaliyah doolatih xisok giffole exxa tet abaanam hadaf luk ugteenimih 40 liggidak bisoh nan.

Nanu guubuh elle nanih nan ní baaxo, bukko kee wararat elle kobroonu waan innah xer waktih Strategy kah ayyaaquk, Qafárak bukkusan baaxot xisnu wayna doolat axcuk, Tamakkel tablen kartal, tamannal weeloysen.

Ta xer waktih ekraaro muddeeh, abbinoysot sissikuk akak cultem, Qarkakisah abbah suge ziyaad barre. Ziyaad barreh doolat tilyaan lih gacak, carbit qafár baaxoh bukko naharak akak qimbiseenim, Erer magaalak sugte.
Too dabaanih carbit ereriiy, afdamaay, bike edde anuk awayih uddur " Sitti zoon" akak iyyan Zoonih gubat raqqatah tan daqorti inkih qafarak tenegele soomaliyah qarkakisa bukkoh teddereh tan baaxo kinni.

Too uddur, Qafar ummatta ereriik gutuqak ilaa gabbi rasu fanah gutqen. Tohuuk lakal itiyoppiyah doolatitteh qokolut, carbit bukkoh been baaxo, Soomaliyak rakaakayih doolat, Sitti zoonih migaaqal muggaaqisak, Soomalih rakaakayat raaqisen..
Too uddur, Qafarak tama gid takke baaxo, doolat madqaak ugutaak Soomalih baaxo kinnim mixxaage geyaak, baaxo asmat isinnim abiteenim edde yismiten udduuruk ten.
..
Naharsim gabat culseenik lakal siyaasa kee wagri migaaqal, Qafar rakaakayih gubat raqtah baaxo, elle wararan innah ekraaro akah bicsak, Baaxot culan elle kobran inna, ahaak gubal bicseenih yan
#Kartal" tamannal daffeysen.

Tama kartal elle tablen innal, Sitti zoonut raaqisen baaxooy, dumaak kobreeni edde anekal, gabbi rasih gammik ilaa dat gita fan culeeniih, Tohum Qunxafoqo kee gadmaytu fan kinni. Dat gitak addah kaadu yangudi raasa edde anuk tonnah gawwaanî xaquk " Gurmudli" edde culseenih yaniinim kee kalah kaadu, Qammih baxi daqar le kabuk dat gitak addah raqta baaxok, tama kartal " Madane" kak iyyeenih yanin, andaadak foocat tan korkorô deqsita arac edde culseenih yanin.

Tonnah #Carri_rasuk....Dawwê daqaarih gammiik, Hawaash weeqaytu fanah culak taareena iyyan aracaay tama kartal#Shakle" iyyan migaq akah abeenih yaniini fan culeenih yanin.

Awsi rasih gammik dat gitak qadaytuk taturra iyyeenih weeqayti gammik qaddaqarak Kaadu weeqaytuuk ilaa masalu kak iyyan aracaay, tama kartal kaadu #Carta" iyya migaq akah abeenih yaniini fan gufen.
....
Kalah kaadu tama kartal elle daffeysen innal, ilaa Aysaqiita fanah ni baaxo buubak, kaxxa soomaliyah xisneh ekraarot culseenih yaniinim tambulle.
Obnook, haarisaay, garaniiy ilaa magentak taturra yeenih, aysaqiita culoonuh, sokkar fabrikak xayi dareefa maadeenih sugeenim inkih kassitnah tan tiya kinni.

Ta kartal tambullem, Qiisi qarkakisa gabat culusseh tan baaxo dibuk hinnay rakaakayak inaytâ magaalak xayi dareefat tanih tan baaxooy, qafar ummatta elle mannowtah tani edde culseenih yanin.
..
Toh tonnal anuk xayi waktih addat, Qiisi qarkakisa uqrat leh tan ekraaro qaduk elle yuybulleenih yanin, Qafar simbilih cararisaanam kee qimbiseenih yanin carbiik lakal, Qafar ummatta qimbisseh tan cakki giclot, qiisi ta kartat culuseh sugeh yan baaxooy caylah elle nookeh suge, Qafar giclaba kak bukkusak, Qusba daqortih xiinisso edde madqaanam xiqqimte.

Tawayih uddur tamaa goori giclot, ken lowsiisih gubat sugteh tan qeeroleek ilaa garani fanah qafar lowsiisit gabat cultem takkay ikkal uxih qiisi baaxô wararat kobreh yan fidin baaxo ninni lowsiisih gubat culsaanam nek qambalsimta. Eddeey data gitak tabbayeh, weeqayti xaqa elle gufeh yan dareefak ken gutqaanam dirkih faxxinta.

Taway tama kartal elle tablen innal, ninni lowsiisih gubat culusneh nan baaxo elle kobornennal, kulli gammiik keenit culak, koboreenih sugen baaxok foyyal ken cabnam faxxinta. Tohum taway madneh nan rikeek ilaa erer fanah takkeh tan fidin baaxo kinni.
Toh aracat haynuh, away edde culleh nan inkittiinol rakuh tan giclot bisoh innam faxxinta.

<script async src="https://pagead2.googlesyndication.com/pagead/js/adsbygoogle.js?client=ca-pub-9722365597729179"

     crossorigin="anonymous"></script>

<!-- Coffee -->

<ins class="adsbygoogle"

     style="display:block"

     data-ad-client="ca-pub-9722365597729179"

     data-ad-slot="3681934026"

     data-ad-format="auto"

     data-full-width-responsive="true"></ins>

<script>

     (adsbygoogle = window.adsbygoogle || []).push({});

</script>